झापा– नेकपा एमालेका अध्यक्ष केपी शर्मा ओलीले आफ्नो निर्वाचन क्षेत्र झापा क्षेत्र न‍. ५ मा निर्माण भएको प्रदेश स्तरीय आयुर्वेदिक औषधालय (अस्पताल) को अवलोकन गरेका छन् ।

आइतवार क्षेत्र नं. ५ स्थित पर्ने कमल गाउँपालिकाको वडा नं. ७ मा निर्माण भएको औषधालयको अवलोकन निरीक्षण गर्दै चाँडै सञ्चालनमा ल्याउन पहल गर्ने पनि ओलीले बताए ।

स्थानीयवासीले नि:शुल्क उपलव्ध गराएको जमिनमा प्रदेश स्तरीय आयुर्वेदीक औषधालय तथा अस्पताल बनेको हो । यसै गरी जमिन हुनेहरुले उपलब्ध गराएमा आवश्यक पूर्वाधार निर्माणले तीव्रता पाउने समेत उनको भनाइ थियो ।

अस्पतालको अवलोकन निरीक्षण पछि ओलीले भने, ‘सकेसम्म जग्गा दान गर्नुहोस्, नागरिकले दिएको जग्गामा सरकारले संरचना बनाउनेछ र विकासले तिव्रता पाउनेछ तर संरचना बन्यो र विकास भयो भन्दैमा जग्गाको दाम चाँहि नबढाउनु होला ।’

आयुर्वेदिक अस्पतालको संरचना बने पनि सञ्चालनका लागि हस्तान्तरण नहुँदा उपयोगमा आउन सकेको छैन । सो अस्पताल चाँडै सञ्चालन गर्ने व्यवस्था मिलाइदिन गाउँपालिकाले संघीय तथा प्रदेश सरकारलाई आग्रह पनि गरेको छ ।