काठमाडौं– युक्रेनमा फसिरहेका आफ्ना नागरिकलाई सहायता गर्न एवम् राहत सामग्री उपलब्ध गराउन भारत सरकारले उद्योगहरुलाई आह्वान गरेको छ । हालै सम्पन्न औद्योगिक प्रतिष्ठानहरूसँगको अन्तरक्रिया कार्यक्रममा भारतको व्यापार तथा वाणिज्य मन्त्रालयले यस्तो आह्वान गरेको हो ।

रुसी आक्रमणको सामना गरिरहेको युक्रेनका छिमेकी देशहरू पोल्याण्ड, स्लोभाकिया, हङ्गेरी र रोमानियामा गरी ३० वटा जति भारतीय कम्पनी एवम् संगठनहरू सक्रिय रहेको बताइएको छ ।

यी संगठनहरुले ४०० स्वयंसेवक परिचालन गरी भारतीय नागरिकलाई बास, खाना र यातायात सेवा दिइरहेको भारतीय सञ्चारमाध्यमले जनाएका छन् ।

‘युक्रेनका छिमेकी देशहरु स्थित हाम्रा नियोग र भारतीय कम्पनीहरुसँग समन्वय गरी सबै भारतीयलाई युक्रेनबाट उद्धार गर्ने कार्यलाई अघि बढाइएको छ ।’ भारतीय अधिकारीलाई उद्धृत गर्दै इकोनोमिक टाइम्सले जनाएको छ ।