काठमाडौँ- अफगानिस्तानको तालिबान शासनमा महिला एवम् बालिकाको जीवन कष्टकर बन्दै जान थालेको मानव अधिकारवादी संस्थाले जनाएको छ ।

अन्तर्राष्ट्रिय मानव अधिकारवादी संस्था एम्नेस्टी इन्टरनेशनलले तालिबानको शासनमा मुलुकमा मानव अधिकारको अवस्था दिन प्रतिदिन खराब बन्दै गएको बताउँदै यसले मुख्यगरी महिला एवम् बालिकाको जीवन दयनीय बनेको जनाएको छ ।

यसबाहेक महिला अधिकारबारे आवाज उठाउने अधिकारवादीहरुलाई पनि धम्की, पक्राउ, यातना र जबरजस्ती बेपत्ता पारिएको एम्नेस्टी इन्टरनेशनलले जनाएको छ ।

भारतीय समाचार संस्था एएनआईका अनुसार एम्नेस्टी इन्टरनेशनलले तालिबानलाई आफ्नो महत्वपूर्ण नीतिहरु पुनर्विचार गरी महिला एवम् बालिकाहरुको अधिकार स्थापित गर्न समेत माग गरेको छ ।

‘अफगानिस्तान कब्जा गरेको एक वर्ष नबित्दै तालिबानको कठोर नीतिहरुले दशौँ लाख अफगान महिला एवम् बालिकाहरुको सुरक्षित एवम् स्वतन्त्रतापूर्वक बाँच्ने अधिकार उल्लङ्घन भएको छ ।’ एम्नेस्टी इन्टरनेशनलकी महासचिव एग्नेश कलामार्डले भनिन् ।

उनले तालिबानको शासन आएदेखि अफगानिस्तानमा महिलाविरुद्ध हिंसात्मक घटना पनि बढेको बताइन् ।