काठमाडौं– भारत जलवायु परिवर्तनका कारण विकासशील मुलुकहरुमा पर्न गएको असरविरुद्ध आवाज उठाउने अग्रणी मुलुकका रुपमा उदाएको भारतीय वातावरणमन्त्री भुपेन्दर यादवले जनाएका छन् ।

लोकसभामा सम्बोधन गर्दै उनले वातावरण विषयमा भारत सदैव ‘समाधान दायक’ मुलुक रहेको समेत टिप्पणी गरेको भारतीय समाचार संस्था एएनआईले जनाएको छ ।

प्रधानमन्त्री नरेन्द्र मोदीको नेतृत्वमा भारतले वातावरणका क्षेत्रमा महत्वपूर्ण प्रगति हासिल गरेको भन्दै उनले विकसित मुलुकहरुले विकासशील मुलुकहरुका लागि १ खर्ब डलरको प्रतिबद्धता जाहेर गरेको समेत जानकारी दिए ।

‘यदी विकसित र विकासशील मुलुक मिलेर मौसम परिवर्तनविरुद्ध लड्ने हो भने विकसित मुलुकहरुले विकासशील मुलुकलाई दुई सेवा गर्नुपर्छ– प्रविधिको हस्तान्तरण र वातावरणीय वित्त ।’ उनले भने ।

उनले विश्वले भारतीय जीवनशैलीबाट पनि वातावरणसँग मिलेर कसरी बस्ने भन्ने सिक्न सक्ने बताए ।