काठमाडौं– आर्थिक संकटसँग जुझिरहेको भारतीय टेलिकम कम्पनी भोडाफोन आइडियाले कम्पनीलाई जोगाउने योजना स्वीकृत गरेको छ । कम्पनीको बोर्ड बैठकले कम्पनीलाई जोगाउनका लागि कूल १ खर्ब ४५ अर्ब भारतीय रुपैयाँ संकलन गर्ने योजना पारित गरेको हो ।

भारतीय सञ्चारमाध्यमहरूले जनाएअनुसार कम्पनीले ऋण र इक्विटीको निष्कासनबाट १ खर्ब भारतीय रुपैयाँ जुटाउनेछ । त्यस्तै, बेलायतस्थित भोडाफोन कम्पनी र भारतको बिरला समूहले कम्पनीमा ४५ अर्ब भारु लगानी गर्ने निर्णय भएको छ ।

कम्पनी बोर्डले कम्पनी उकास्न पुँजी जुटाउने निर्णय गरेपछि मुम्बईस्थित बम्बे स्टक एक्सचेन्जमा कम्पनीको शेयर पनि बढेको भारतीय सञ्चारमाध्यमले जनाएका छन् ।

बोर्डको यो निर्णय पारित गर्न आगामी मार्च २६ मा कम्पनीको विशेष साधारणसभा पनि डाकिएको छ ।