महोत्तरी– क्रसर माफियाविरुद्ध आवाज उठाउँदा हत्या गरिएका पर्यावरण अभियानी दिलिप महतोलाई ‘पर्यावरण शहीद’ घोषणा गर्न युवाहरूले दबाब दिएका छन् ।

युवाहरूको समूह युथ एसोसिएसन अफ नेपालले महोत्तरीका प्रमुख जिल्ला अधिकारी बासुदेव दाहाललाई ज्ञापनपत्र बुझाएको हो । एसोसिएसनका प्रवक्ता राजुकुमार महतो नेतृत्वको टोलीले प्रमुख जिल्ला अधिकारी दाहाललाई ज्ञापन पत्र बुझाएको छ । क्रसर माफियाविरुद्ध बोल्दा दिलिपको हत्या गरिएको थियो ।

उनीहरूले घटनाको छानबिन केन्द्रीय स्तरबाट गराई दोषीलाई कारबाही गर्न पनि माग गरेका छन् ।

ज्ञापनपत्र बुझ्दै प्रमुख जिल्ला अधिकारी दाहालले महतोलाई पर्यावरण शहीद घोषणा गराउन आफूले पहल गर्ने आश्वासन दिए । यसअघि संघीय सरकारका वन तथा वातावरणमन्त्री रामसहाय यादवलाई ज्ञापनपत्र बुझाइएको थियो ।

वातावरणको दोहन गर्नेविरुद्ध आवाज उठाउने धनुषाको मिथिला नगरपालिका–५ श्रीपुरका २४ वर्षीय ओमप्रकाश महतो ‘दिलिप’ को हत्या भएको थियो । २०७६ पुस २५ औरही खोलामा भइरहेको अबैध दोहन रोक्न पुगेका महतोको हत्या गरिएको थियो । उक्त घटनामा संलग्नहरूमाथि मुद्दा चलाएको छ । तीन जनालाई भने घरौटीमा छाडिएको छ ।