काठमाडौं–डिजिटल नेपाल बनाउने अभियानमा विद्युतीय भुक्तानी सेवा प्रदायक वालेट माइपे पनि जोडिएको छ । पछिल्ला दिनहरुमा नेपालीहरु डिजिटल प्रविधि प्रति आकर्षित भइरहेको बेलामा स्मार्ट कार्ड नेपालले नयाँ वालेट सञ्चालनमा ल्याएको हो । वालेटका अनुसार हाल बजारमा रहेको भुक्तानी सेवा प्रदायकहरुले भन्दा नवीन र उत्कृष्ट सुविधाहरु यस वालेटबाट प्राप्त गर्न सकिनेछ ।

नेपालमा कोरोना संक्रमण बढेपछि यहाँ डिजिटल कारोबारको संख्या ह्वात्तै बढेको थियो । हाल माइपे सामान्य सेवाहरुसहित आफ्नो प्रणालीको स्थायित्व परीक्षण गरिरहेको छ । हाल यस वालेटबाट मोबाइल टपअप बिजुलीको बिल भुक्तानी, इन्टरनेटको बिल भुक्तानी, टिभीको बिल भुक्तानी लगायतका सेवाहरु प्राप्त गर्न सकिन्छ । माइपे वालेटमा सजिलै कुनै पनि बैंकबाट फन्ड लोड गरी कारोबार गर्न सकिन्छ ।

हाल सञ्चालनमा रहेको बिद्युतिय भुक्तानी सेवा प्रदायकहरुको सेवामा रहेका बिजुली, इन्टरनेट वा अन्य बिल भुक्तानी गर्ने परम्परागत शैलीलाई चिर्दै माइपेले ग्राहकहरुमाझ उहाँहरुको आवश्यकता र दुःख बुझेर नवीनतम सेवा तथा सुविधाहरुको स्वाद दिने माइपेका सिइओ मनोज कुमार मेहताले बताए । उनले अहिले परीक्षणका रुपमा केही विशेषताहरु मात्रै राखेर माइपे वालेट सार्वजनिक गरेको जनाउदै वालेटको परफमेन्स र सर्वसाधारणको प्रतिक्रिया हेरेर छिट्टै नै अति आवश्यक, सहज र नवीन सुविधाहरुसहितको पूर्ण रुपको वालेट सार्वजनिक गर्ने खुलाए । उनका अनुसार माइपेमा भविष्यमा वालेटको परिभाषा नै बदल्ने गरी भुक्तानी सेवा मात्रै नभई अन्य अत्यावश्यक सेवाहरु थपिनेछन् ।

हाल वालेटमा उपलब्ध सेवाहरु पहिलो पटक प्रयोग गर्दा २५ प्रतिशत वा अधिकतम रु १०० रुपैयाँसम्म क्यासब्याक अफर ल्याएको छ । आगामी दिनमा समेत विभिन्न उत्साहजनक अफरहरु ल्याउने माइपेको भनाइ छ ।