काठमाडौँ– नेपाल राष्ट्र बैंकका गभर्नर महाप्रसाद अधिकारीले नेपालको आर्थिक वृद्धि सन्तोषजनक नै रहेको दाबी गरेका छन् । 

बुधबार नेपाल चार्टड् एकाउन्टेन्ट्स संस्था (आईक्यान) ले गरेको कार्यक्रममा गभर्नर अधिकारीले गत वर्ष ५ दशमलव ८ आर्थिक वृद्धि रहेकोमा यस वर्षको ५ दशमलव ५ प्रतिशत रहनु सन्तोषजनक नै मान्नुपर्ने बताएका हुन् । 

उनले विश्व बजारमा देखिएको इन्धनको मूल्यवृद्धिको असर नेपालको अर्थतन्त्रमा देखिएको पनि बताए ।

अहिलेको अवस्थामा बाह्य क्षेत्र नै चुनौतीपूर्ण रहेको उनको भनाइ छ । उनले करिब दुई अर्बको निर्यातले २१ अर्बको आयातलाई धान्न नसक्ने भन्दै इम्पोर्ट धान्न रेमिट्यान्स भए पनि अहिले रेमिट्यान्स सस्टेनेबल नरहेको तर्क गरे ।

गभर्नर अधिकारीले रेमिट्यान्सलाई औपचारिक बनाउन खोज्दा पनि सम्भव नहुने देखिएको बताए ।

उनले केही आयात गरेका सामाग्रीहरू नेपालमा नै प्रयोग नहुने अवस्था अहिले पनि देखिएको भन्दै त्यस विषयमा अनुसन्धानको आवश्यकता रहेको धारणा राखे ।