काठमाडौँ – आज २०७९ साल भदौ १८ गते शनिबार । सन् २०२२ को सेप्टेम्बर ३ तारिख । आजको दिन इतिहासमा भएका केही महत्वपूर्ण घटनाक्रम यस्ता छन् :

सन् १९९५ सेप्टेम्बर ३ मा पियरे ओमिड्यारले इन्टरनेट जायन्ट ‘ईबे’ को स्थापना गरेका थिए । सो कम्पनी अनलाईन बजार र बोलकबोल वेभसाइट ‘ईबेडटकम’ को प्रसिद्ध छ ।

सन् १९८१ सेप्टेम्बर ३ मा इजिप्टले सरकार विरुद्धमा रहेका १५०० जनालाई पक्राउ गरेको थियो ।

सन् १९७६ सेप्टेम्बर ३ मा ‘अमेरिकाको भाइकिङ २’  मंगल ग्रहमा अवतरण भएको थियो । अन्तरिक्ष यात्रीहरुको उपस्थिति नभएको सो विमानले मंगल ग्रहको पहिलो रङ्गीन तस्वीर खिचेको थियो ।

सन् १९७१ सेप्टेम्बर ३ मा कतार स्वतन्त्र भयो । ५५ वर्ष बेलायत साम्राज्यले शासन गरेपश्चात कतारले स्वतन्त्रता प्राप्त गरेको थियो ।

सन् १९६७ सेप्टेम्बर ३ मा लेफ्टिनेन्ट जनरल न्युयेन भान थिउ दक्षिण भियतनामको राष्ट्रपतिमा नियुक्त भएका थिए ।

सन् १९४३ सेप्टेम्बर ३ मा क्यालाब्रियामा अवतरण गरेसँगै बेलायती सेनाले इटाली अतिक्रमण गरेको थियो ।

सन् १९१८ सेप्टेम्बर ३ मा संयुक्त राज्य अमेरिकाले चेकोस्लोभाकियालाई राष्ट्रको मान्यता दिएको थियो ।

सन् १७८३ सेप्टेम्बर ३ मा बेलायत र संयुक्त राज्य अमेरिकाले पेरिस सन्धिमा हस्ताक्षर गरेका थिए । सो सन्धिपश्चात अमेरिकी क्रान्तिकारी युद्धको समाप्ति भएको थियो ।