काठमाडौं– अफगानिस्तानमा तालिबानले सत्ता कब्जा गर्ने बेला धेरै अफगान सैनिक भागेर पाकिस्तान प्रवेश गरेको खुलासा भएको छ ।

सीमाबारे अमेरिकी प्रतिवेदनमा गत वर्षको अगस्ट महिनामा तालिबानले अफगानिस्तानमा कारवाही गर्ने बेला धेरै अफगान सैनिक भागेर पाकिस्तान प्रवेश गरेको उल्लेख छ ।

उक्त प्रतिवेदनमा पाकिस्तान र इरानसँग जोडिएका सीमा नाका तालिबानले कब्जा गरेका कारण पनि तत्कालिन अफगान सरकार पतन भएको उल्लेख छ ।

पाकिस्तानबाट प्रकाशित हुने डन अखबारको अनलाइन संस्करणले जनाएअनुसार प्रतिवेदनमा तालिबानले काबुल कब्जा गर्नु केही साताबाट नै अफगान सैनिकहरु भागेर पाकिस्तान जान थालेको उल्लेख छ ।

‘तालिबानले जिल्ला र प्रान्तीय राजधानीमा आक्रमणलाई तीव्रता दिएसँगै धेरै अफगान सैनिकहरु भागेर पाकिस्तान प्रवेश गरेका थिए ।’ प्रतिवेदनमा जनाइएको छ ।

यस्तै, संयुक्त राष्ट्रसंघीय शरणार्थी निकायका अनुसार अगस्ट २०२१ र जनवरी २०२२ को बीचमा ३ लाख भन्दा धेरै अफगान नागरिकहरु शरणार्थीको रुपमा पाकिस्तान पुगेका थिए । यद्यपि यिनीहरुमध्ये कति जना सैनिक थिए भन्ने स्पष्ट नभएको बताइएको छ ।