काठमाडौँ– अफगानिस्तानमा भएको आत्मघाती बम आक्रमणमा एकजना वरिष्ठ धर्मगुरुसहित १५ जनाको मृत्यु भएको छ ।

अफगानिस्तानको हेरात सहरमा रहेको एक मस्जिदअगाडि बम आक्रमण भएको हो । आक्रमणका क्रममा अफगानिस्तानको शासन चलाइरहेको तालिबानका समर्थक एकजना वरिष्ठ धर्मगुरु पनि मारिएको कतारी टेलिभिजन च्यानल अल जजीराको अनलाइन संस्करणले जनाएको छ ।

मारिने ती धर्मगुरु मुजिब रहमान अन्सारी रहेको र आक्रमणमा उनका सुरक्षा गार्डहरु पनि मारिएको हेरातका प्रहरी प्रवक्ता महमुद रसूलीलाई उद्धृत गर्दै अल जजीराले जनाएको छ ।

हेरात सहरको गुजरगाह मस्जिदमा शुक्रबार मध्यान्हको प्रार्थानाको समयमा बम आक्रमण भएको थियो ।

रसूलीले आक्रमणमा भएको हताहतीको संख्याबारे नखुलाएपनि स्रोतलाई उद्धृत गर्दै १५ जनाको मृत्यु भएको अल जजीराले उल्लेख गरेको छ । आक्रमणमा अरु २१ जना घाइते भएको स्थानीय स्वास्थ्यकर्मीले जनाएका छन् ।

ती धर्मगुरु घरबाट मस्जिद जाने क्रममा रहेको र मस्जिदनजिकै आत्मघाती आक्रमणकारीले अविवदानस्वरुप उनको हातमा चुम्बन गर्न खोजेको जनाइएको छ । त्यही मौकामा आत्मघाती आक्रमणकारीले विस्फोट गराएको थियो ।

यता तालिबानका प्रवक्ता जबिहउल्लाह मुजाहिदले आक्रमणको निन्दा गर्दै यसमा संलग्नलाई कारवाही गरिने जनाएका छन् ।

आक्रमणको जिम्मा हालसम्म कसैले पनि लिइसकेको छैन । यद्यपि पछिल्लो केही समययता अफगानिस्तानमा आतंककारी संगठन इस्लामिक स्टेटले सैनिक एवम् सार्वजनिक निशानालाई लक्षित गरी यस्ता आक्रमण गराउँदै आएको छ ।