काठमाडौँ- युरोपेली र दक्षिण अमेरिकी फुटबलका विजेताबीच आयोजना गर्न लागिएको ‘फाइनलिसिमा’ खेलमा बुधबार अर्जेन्टिना र इटालीबीच प्रतिस्पर्धा हुने भएको छ ।

बेलायतको लन्डनस्थित वेम्बली स्टेडियममा अर्जेन्टिना र इटाली आमने सामने हुनेछन् । दुबै टोली नेपाली समयअनुसार राति साढे १२ बजे मैदान उत्रिनेछन् ।

इटालीले पछिल्लो संस्करणको युरोकप जित्दै तथा अर्जेन्टिनाले कोपा अमेरिकाको उपाधि जित्दै फाइनलिसिमामा ठाउँ पक्का गरेका हुन् ।

सन् २०२० को युरोकप फाइनलमा इटालीले इङ्ल्याण्डलाई पेनाल्टीमा पराजित गर्दै उपाधि जितेको थियो । यता अर्जेन्टिनाले भने फाइनलमा ब्राजिललाई १–० गोल अन्तरले पराजित गर्दै २०२१ को कोपा अमेरिकाको उपाधि जितेको थियो ।

फाइनलसिमा ठिक ९० मिनेटको लागि खेलाइन्छ । निर्धारीत समयसम्म खेल बराबरीमा सकिएको खण्डमा भने विजेताको निर्णयका लागि पेनाल्टी सुट आउटबाट हुनेछ ।

युरोपेली फुटबल महासंघ युएफा र दक्षिण अमेरिकी फुटबल महासंघ कोन्मेबोलको समन्वयमा फाइनलिसिमाको आयोजना गरिएको हो । २०२२ को खेल फाइनलिसिमाको तेस्रो संस्करण हुनेछ ।

यसअघि सन् १९८५ मा फ्रान्सको पेरिसमा भएको पहिलो संस्करण फ्रान्सले जितेको थियो । सन् १९९३ मा अर्जेन्टिनाको मार देल प्लाटामा भएको दोस्रो संस्करण भने अर्जेन्टिनाले जितेको थियो ।