काठमाडौँ– नेपाल बार एशोसिएशनको नयाँ कार्य समितिको चुनावमा सत्तापक्षीयसम्बद्ध कानुन व्यवसायी र प्रतिपक्षी दलसम्बद्ध कानुन व्यवसायीबीच प्रतिस्पर्धा हुने भएको छ ।

२६ औँ केन्द्रीय कार्य समितिका लागि सत्ता गठबन्धन पक्षधर कानुन व्यवसायी वरिष्ठ अधिवक्ता गोपालकृष्ण घिमिरे प्यानेल र प्रतिपक्षी दलसम्बद्ध कानुन व्यवसायी वरिष्ठ अधिवक्ता विष्णुमणि अधिकारी प्यानेलबीच प्रतिस्पर्धा हुने भएको हो ।

घिमिरे नेतृत्वको समूह ‘बृहत् लोकतान्त्रिक, प्रगतिशील, समावेशी तथा पेसागत कानुन व्यवसायी समूह’ रहेको छ । त्यस्तै, अधिकारी नेतृत्वको ‘प्रगतिशील तथा पेसागत कानुन व्यवसायी समूह’ रहेको छ ।

दुवै पक्षले आफू चुनावमा जित्ने दाबी गरेका छन् ।

घिमिरेले न्यायालयमा देखिएका विकृति र विसंगति शुद्धीकरणमा आफ्नो समूह जुट्ने प्रतिबद्धता जनाएका छन् ।

आफनो समूह हरेक हिसाबले अब्बल रहेको र कानुन व्यवसायीको पेसागत सुरक्षाका लागि काम गर्ने पनि उनले प्रतिबद्धता जनाए ।

त्यस्तै, अधिकारीले आफ्नो समूहले कानुन साक्षरता अभियान चलाउने बताए । उनले प्रत्येक कानुन व्यवसायीले न्यायका लागि अदालत जान नसक्नेलाई निःशुल्क कानुनी सेवा दिने पनि प्रतिबद्धता जनाए ।

एशोसिएशनको चुनाव चैत १९ गते शनिबार हुनेछ ।