काठमाडौँ – नेशनल अवार्ड विनर निर्देशक नीतेश तिवारीको निर्देशनमा बन्ने फिल्म ‘बबाल’ मा वरुण धावन र जाह्न्वी कपूरको अभिनय रहने भएको छ ।

निर्माण पक्षले टाइटल रिभिल गर्दै स्टारकास्ट बारे पनि जानकारी दिएको छ । दंगाल र छिछोरे जस्तो बलियो फिल्म बनाएका नीतेशले यसपटक पनि सोसल ड्रामालाई नै दर्शक समक्ष पेश गर्नेछन् । पछिल्लो दुई फिल्मबाट नीतेशले दर्शकको मन जितिसकेका छन् । ‘दर्शकको विश्वास बढ्दा हाम्रो काम अझै बलियो हुनुपर्छ’ नीतेशले भारतीय मिडियासँग कुराकानी गर्दै भनेका छन् ।

नीतेशसँग काम गर्न पाउँदा वरुण निकै उत्साहित छन् । अक्टोबर , बद्लापुर जस्ता अभिनय देखाउन सकिने फिल्म गरेका वरुण नीतेशसँग फिल्म गर्न चाहन्थे । ‘मलाइ नीतेश सरको काम निकै मन पर्छ । उहाँलाई हामीले गर्न सक्ने काम थाहा छ । अनि उहाँले दंगाल र छिछोरे जस्ता फिल्म बनाएर आफ्नो निर्देशकीय क्षमतालाई समेत प्रस्ट्याई सक्नु भएको छ’ वरुणले भारतीय मिडियालाई प्रतिक्रिया दिएका छन् ।

यसैगरी टाइटल रिभिल भएपछि वरुणले शेयर गरेको पोष्टमा प्रतिक्रियाहरु आइरहेका छन् । वरुण र जाह्न्वीको जोडीलाई लिएर दर्शकले विभिन्न किसिमका कम्नेटहरु गरिरहेका छन् ।