काठमाडौँ- रुसको समाचार संस्था रिया नोभोस्तीले युक्रेनमा युद्ध सकिनुअगावै जितको खबर छापेपछि हाँसोको पात्र बनेको छ । रियाका संवाददाता पिटर अकोपोभले ‘रुसको आगमन र नयाँ विश्व व्यवस्था’ शीर्षकमा लेखेको सम्पादकीय समाचारमा युक्रेनमा रुसी विजयको प्रशंसा गरिएको छ ।

समाचारमा युक्रेन रुसमा गाभिएको भन्दै ‘युक्रेनी समस्या’ समाधान गरेकोमा राष्ट्रपति भ्लादिमिर पुटिनको प्रशंसा समेत गरिएको छ ।

शीघ्र रुसी विजयको अपेक्षाका कारण चाँडो गरी उक्त समाचार प्रकाशन भएको हुनसक्ने बीबीसीले जनाएको छ । समाचारमा सन् १९९१ मा ‘नराम्रो विपत्ती’ सोभियत संघको पतन पछि रुस नयाँ विश्व व्यवस्थाको नेतृत्व गर्न फर्केको उल्लेख छ ।

समाचारमा मस्कोले ‘रुसी, बेलारुसी र साना रुसी (युक्रेनी)’ हरुलाई जोडिरहेको र यसका लागि पुटिनलाई जस दिइनुपर्ने उल्लेख गरिएको छ ।

‘युक्रेनी समस्याको समाधान भावी पुस्तामाथि थोपर्ने निर्णय नगरेर भ्लादिमिर पुटिनले ऐतिहासिक जिम्मेवारी बहन गरेका छन् ।’

युद्ध सकिनुअगावै छापिएको उक्त समाचार अहिले भने रिया नोभोस्तीले आफ्नो वेबसाइटबाट हटाएको बीबीसीले जनाएको छ । यद्यपि रियासँग अनुमति लिई समाचार छाप्ने केही साइटहरुमा भने अझै उक्त समाचार पढ्न सकिने जनाइएको छ ।