काठमाडौँ– पूर्वसभामुख एवम् वरिष्ठ अधिवक्ता दमननाथ ढुंगानाले राज्यका हरेक अंग बिटुलिन थालेको बताएका छन् ।

सबै अंग बिटुलिन थालेपछि त्यसको शुद्धीकरण गर्न आन्दोलन गर्नु परेको उनले बताए । उनले भने, ‘यो आन्दोलन न्यायालयमा शुद्धीकरणका लागि हो ।’

ढुंगानाले भने, ‘यो शुद्धीकरण अभियान हो । न्यायालयमात्रै होइन संविधानले व्यवस्था गरेका हरेक अंगहरू बिटुलिन थालेका छन् । यसको शुद्धीकरणको सुरूआत न्यालयबाट सुरू गरेका छौँ ।’

त्यस्तै सर्वोच्च बारका अध्यक्ष पूर्णमान शाक्यले यो आन्दोलन न्यायालयको शुद्धीकरणका लागि भएको बताए । शाक्यले भने, ‘यो प्रधानन्यायाधीशविरूद्ध मात्रै होइन । यो न्यायालयको सुधारका लागि हो । न्यायपालिकाप्रति जनआस्था बढाउन र राज्यका अंगहरूबीच शक्ति सन्तुलनलाई कायम गरू संविधान बर्करार राख्न हामीले आन्दोलन गर्नु परेको हो । यो आन्दोलन फिर्ता हुँदैन ।’