काठमाडौँ– चीनले अनुदानमा दिन लागेको कोरोना विरुद्धको खोप ल्याउन नेपाल एअरलाइन्सको विमान आज बेइजिङ जाने भएको छ ।

चिनियाँ खोप ल्याउन नेपाल एयरलाइन्सको विमान आज राति साढे ११ बजे जाने जनाइएको छ । विमान खोप लिएर भोलि दिउँसो साढे २ बजे नेपाल आइपुग्ने कार्यतालिका रहेको एयरलाइन्सले जनाएको छ ।

राष्ट्रपति विद्यादेवी भण्डारीले खोप सहयोगका लागि आग्रह गरेपछि चिनियाँ राष्ट्रपतिले १० लाख डोज खोप उपलब्ध गराउने जनाएका थिए । जसमध्य भोलि ८ लाख डोज खोप ल्याइने जनाइएको छ ।

नेपाल वायु सेवा निगमका अप्रेशन विभाग प्रमुख दिपु जहार्चनले आठ लाख डोज खोप ल्याउन जहाज बेइजिङ जान लागेको बताए ।

राष्ट्रपति विद्यादेवी भण्डारीले गत बुधवार चिनियाँ राष्ट्रपति सी जिनपिङसँग टेलिफोन संवाद गरेर नेपाललाई खोप दिएर सहयोग गर्न अनुरोध गरेकी थिइन ।

यसअघि चीनले आठ लाख डोज खोप अनुदानमा दिएको थियो । सरकारले कोरोना भाइरस संक्रमणको जोखिमलाई मध्यनजर गर्दै चिनिया खोप भेरोसेल खरिदका लागि पनि कुटनीतिक पहल गरिरहेको जनाएको छ ।