मुम्बई–बलिउडका अहिलेका हटकेक अभिनेता कार्तिक आर्यन पछिल्लो समय निकै चर्चामा छन् । चर्चामा यसकारण छन् कि उनको हातबाट एकपछि अर्को फिल्म खोसिँदै गइरहेका छन् ।

नवभारत टाइम्सका अनुसार केही समय अघि करण जोहारको फिल्म ‘दोस्ताना २’बाट अलग्गिएका थिए । त्यसपछि उनी शाहरुख खानको प्रोडक्सनको फिल्म ‘फ्रेडी’बाट निकालिए । अहिले आएर पुनः अर्को एउटा ठूलो बजेटको फिल्मबाट कार्तिक निकालिएका छन् ।

कार्तिकलाई निर्देशक आनन्द एल रायको एक अनटाइटल्ड ग्याङस्टार फिल्मका लागि प्रस्ताव गरिएको थियो । ‘कार्तिकको आनन्दसँग कुराकानी भइरहेको थियो । उनले फिल्मको कथा पनि पढे र त्यसको नेरेसन सुने । तर फिल्म साइन गर्नु अघि नै कुरा बिग्रियो । फिल्मको निर्देशन आनन्दका असिस्टेन्टले गर्ने तयारीमा थिए’ आनन्द निकट स्रोतले भनेको छ ।

कार्तिक र आनन्द एकसाथ फिल्ममा काम गर्ने खबर यो वर्षको फेब्रुअरीबाटै आइरहेको थियो । यो समयमा कार्तिकलाई आनन्दको मुम्बईस्थित कार्यालय बाहिर देखिएपछि उनी आनन्दसँग सहकार्य गर्न लागेको खबर बाहिर आएको थियो ।

यद्यपि कार्तिक आनन्दको फिल्मबाट के कारणले बाहिरिए भन्ने कारण खुल्न सकेको छैन । तर फिल्म पण्डितहरुले करणको फिल्मबाट कार्तिक बाहिरिनु नै उनका लागि अभिषाप बनेको दाबी गरेका छन् । त्यहीकारण पनि कार्तिक एकपछि अर्को ठूलो व्यानरमा अँटाउन सकिरहेका छैनन् ।

कार्तिक निकालिएपछि अब उनको स्थानमा आनन्दले आयुष्मान खुरानालाई अनुबन्धित गर्ने सोच बनाइसकेका छन् । आनन्दका साथ आयुष्मानले यसअघि ‘शुभ मंगल सावधान’ र ‘शुभ मंगल ज्यादा सावधान’ जस्ता फिल्ममा काम गरिसकेका छन् ।