जनपुरधाम– महोत्तरीमा पाँच वर्षीय बालकको शव फेला परेको छ । बुधबारदेखि हराइरहेका बालकको शव परालले छोपिएको अवस्थामा फेला परेको हो ।

रामगोपालपुर नगरपालिका – ६ विशम्भरपुरका ५ वर्षीय बालक रितेशकुमारको हत्या गरिएको प्रकृति जस्तो देखिएको महोत्तरीका प्रहरी नायव उपरीक्षक प्रकाश विष्टले जानकारी दिए ।

प्रहरीले छोराको हत्या आरोपमा आमा बुबालाई पक्राउ गरेको छ । छोराको हत्या आरोपमा बुबा चन्द्रकिशोर यादव र सौतेनी आमा रागनी मुखियालाई अनुसन्धानको लागि पक्राउ गरिएको डीएसपी विष्टले बताए । मृत बालकको बुबालाई गाउँबाटै र सौतेनी आमा रागनीलाई माइत धनुषाको बटेश्वर गाउँपालिका ५ शान्तिपुरबाट पक्राउ गरिएको हो ।

बुधबार अपराह्न करिब ५ बजेदेखि बालक हराइरहेका थिए । बिहीबार दिउँसो घरबाट ४० मिटर पर बगैंचामा परालले छोपेको अवस्थामा मृत फेला परेको थियो । प्रहरीका अनुसार शव र घटनास्थलको प्रकृति हेर्दा बालकको हत्या भएको देखिएको छ ।

पोस्टमार्टमका लागि शव प्रादेशिक अस्पताल जनकपुर ल्याइएको छ । घटनाको अन्य पाटोबाट अनुसन्धान भइरहेको डीएसपी विष्ट बताए ।