काठमाडौँ– प्रधानमन्त्री केपी शर्मा ओलीले शिक्षा विज्ञान तथा प्रविधि मन्त्रालयसहित पाँच वटा मन्त्रालयको जिम्मेवारी पाएका मन्त्री कृष्णगोपाल श्रेष्ठलाई बबरमहलकी सरस्वती प्रधानमाथि लागेको जातीय विभेदको आरोपका विषयमा सचेत गराएका छन् ।

कोठा भाडामा दिने विषयमा एक जना सञ्चारकर्मी रूपा सुनारमाथि जातीय विभेद गरेको भन्ने उजुरीमा पक्राउ परेकी प्रधानलाई तेस्रो दिनमा मन्त्री श्रेष्ठ आफैँ प्रहरी कार्यालयमा उपस्थित भएर छुटाएका थिए ।

मन्त्री श्रेष्ठले आफ्नै गाडीमा राखेर प्रधानलाई उनको घरसम्म पुर्‍याएका थिए । मन्त्री श्रेष्ठको यस्तो गतिविधिको चर्को विरोध भएको थियो ।

सोमबार भएको मन्त्रिपरिषद् बैठकमा प्रधानमन्त्रीले मन्त्री श्रेष्ठलाई सचेत गराएको कुरा कानून, न्याय तथा संसदीय मामिला मन्त्री लीलानाथ श्रेष्ठले मङ्गलबार पत्रकार सम्मेलनमा जानकारी गराएका हुन् ।

कानुनमन्त्री श्रेष्ठले पत्रकार सम्मेलनमा शिक्षामन्त्री श्रेष्ठले जातीय विभेदमा पक्राउ परेकी प्रधानलाई छुटाएको प्रसङ्ग उठेपछि कानूनन्त्री श्रेष्ठले यस विषयमा प्रधानमन्त्रीले सचेत गराइसकेको बताएका हुन् ।

आफूमाथि जातीय विभेद गरेको आरोप लगाउँदै सञ्चारकर्मी सुनुवारले प्राधनविरुद्ध प्रहरीमा उजुरी दिएकी थिइन् । उजुरीपछि प्रधान पक्राउ परेकी थिइन् ।

पक्राउ परेको तेस्रो दिनमा आरोपको प्रमाण नपुगेको कारण जनाएर प्रधानलाई रिहा गरिएको थियो ।