मुम्बई– बलिउड अभिनेता टाइगर श्राफको डेब्यू फिल्म ‘हीरोपन्थी’को सिक्वेल ‘हिरोपन्थी २’मा अभिनेता नवाजुद्दीन सिद्दीकी भिलेन चरित्रमा देखिने भएका छन् । फिल्ममा उनको भीडन्त अभिनेता टाइगरसँग हुनेछ ।

नवभारत टाइम्सका अनुसार ‘हिरोपन्थी २’को घोषणा गत वर्ष भएको थियो र फिल्म यसै वर्षको सुरुवातमा फ्लोरमा आएको थियो । फिल्मको पहिलो सेड्युल कोरोना महामारीको दोस्रो लहर आउनु अघि नै पुरा भइसकेको छ ।

महाराष्ट्रमा महामारीपछि गरिएको लकडाउन खुल्नासाथ सुटिङ सुरु हुनेछ । फिल्ममा अहमद खानको निर्देशन छ । जसले यसअघि ‘बागी २’ र ‘बागी ३’को निर्देशन गरेका थिए ।

सन् २०१४ मा रिलिज फिल्म ‘हिरोपन्थी’मा टाइगरसँगै कृति सेननको अभिनय थियो । फिल्म ‘हिरोपन्थी २’मा टाइगरको अपोजिटमा तारा सुतारिया हुनेछिन् ।

यसअघि टाइगरले आफ्नो जन्मदिनमा ‘हिरोपन्थी २’ डिसेम्बर ३ मा रिलिज हुने जानकारी दिएका थिए । यो फिल्म यसअघि जुलाई १६ मा रिलिज हुने तयारीमा थियो । फिल्म ‘हिरोपन्थी २’मा साजिद नाडियाडवालाले लगानी गर्दैछन् ।

फिल्म ‘हिरोपन्थी २’ अघि टाइगर र नवाजुद्दीनले फिल्म ‘मुन्ना माइकल’मा सहकार्य गरिसकेका छन् । टाइगर पछिल्लोपटक फिल्म ‘बागी ३’मा देखिएका थिए ।

उनी अब ‘हिरोपन्थी २’बाहेक ‘बागी ४’ र ‘रेम्बो’ जस्ता फिल्ममा पनि अभिनय गर्दैछन् ।