काठमाडौँ – डिफेन्डर विराज महर्जनले नेपाली राष्ट्रिय फुटबल टिमबाट सन्यास लिएका छन् । राष्ट्रिय टिममा डेब्यू गरेको १३ वर्ष पूरा गरेका  उनले सोमबार सन्यास लिएका हुन् ।

काठमाडौँमा भएको थ्री नेसन्स कपका लागि राष्ट्रिय टिममा परेका विराजको यो प्रतियोगिता राष्ट्रिय टिमको अन्तिम प्रतियोगिता बन्यो ।

सन् २००८ मार्च २५ मा पाकिस्तानविरुद्धको मैत्रीपूर्ण खेलबाट राष्ट्रिय टिममा डेब्यू गरेका ३० वर्षीय विराज एन्फा एकेडेमीका उत्पादन हुन् ।

विराजले सन् २००७ बाट थ्रीस्टार क्लबबाट व्यवसायिक फुटबल यात्रा सुरु गरेका थिए । उनले ९ वर्ष थ्रीस्टारबाट खेलेपछि २०१६ मा मनाङ मर्स्याङ्दी क्लबमा आबद्ध भइ सन् २०१९ मा मच्छिन्द्र क्लबमा पुगे । उनले खेलेका तीन वटै क्लबबाट लिग जित्ने अवसर पाए ।

राष्ट्रिय टिमबाट ७५ खेल खेलेका उनले नेपाली टिमको कप्तानी गर्ने अवसर पनि पाए । अनिल गुरुङले सन्यास लिएपछि विराज नेपाली टिमको नियमित कप्तानको भूमिकामा देखिए ।

नेपालले बंगबन्धु गोल्डकप, १२औँ साग र सोलिडारिटी कप जित्दा विराज मैदानमा कप्तानको भूमिकामा थिए ।