नवलपुर– नवलपरासी पूर्व हुप्सेकोटमा पहिरोमा पुरिएर बेपत्ता भएका तीन जनाको शव भेटिएको छ । बुधबारदेखिको अविरल वर्षापछि विहीबार राति पहिरो जाँदा एकै परिवारका तीन जना बेपत्ता भएका थिए ।

बेपत्ता तीनै जनाको शव शनिबार दिउँसो फेला परेको जिल्ला प्रहरी कार्यालयका प्रहरी निरीक्षक मधुसूदन सिंहले जानकारी दिए । उनका अनुसार शनिबार पहिरो पन्छाएर शव निकालिएको छ ।

पहिरोमा परि मृत्यु हुनेमा ४० बर्षीया धनमाया पुलामी, नातिनीहरु ६ वर्षकी देउमाया र ७ वर्षिया भूमीसरा पुलामी रहेका छन् ।

बुधवार रातिदेखि निरन्तर परेको बर्षाका कारण पहिरो जाँदा हुप्सेकोट गाउँपालिकाको पहाडी गाउँ रुम्सीको चारघरेमा बिहीवार राति तीन जना बेपत्ता भएका थिए ।

प्रहरी, सशस्त्र प्रहरी र स्थानीयले शुक्रवार दिनभरको खोजतलास गर्दा फेला पार्न नसकेपछि शनिबार बिहानबाट पुनः खोजतलास गरिएको थियो ।