काठमाडौँ- कोपा अमेरिका कप फुटबलमा आयोजक ब्राजिल र इक्वेडरसँग बराबरीमा रोकिएको छ ।

सोमबार बिहान भएको खेलमा ब्राजिलले इक्वेडरसँग १-१ गोलको बराबरी खेलेको हो ।

पेड्रो ओलम्पिक स्टेडियममा सुरुवाती अग्रता जोगाउन नसक्दा ब्राजिल बराबरीमा रोकिएको हो ।

खेलको ३७औँ मिनेटमा इडर मिलिटाओले गोल गर्दै ब्राजिललाई अग्रता दिलाएका थिए । तर, खेलको ५३ औं मिनेटमा एन्जल मिनाले गोल गर्दै इक्वेडरलाई १-१ गोलको बराबरीमा ल्याए ।

यसअघि नै क्वाटरफाइनलमा पुगिसकेको ब्राजिलले स्टार फरवार्ड नेयमारलगायतका खेलाडीलाई विश्राम दिएको थियो । बराबरी पछि पनि ब्राजिल समूह ‘बी’ को समूह विजेता बन्दै क्वाटरफाइनलमा पुगेको छ । समूह चरणमा अपराजित ब्राजिलले ४ खेलमा १० अंक जोड्यो ।

इक्वेडरले ४ खेलमा ३ अंक जोड्यो । इक्वेडर पनि चौथो स्थानमा रहदै क्वाटरफाइनलमा पुगेको छ ।