ललितपुर– किष्ट मेडिकल कलेज तथा शिक्षण अस्पतालको अगुवाइमा ललितपुरको दक्षिणी भेगमा कार्यरत स्वास्थ्यकर्मीलाई कोरोनाविरूद्धको खोप वितरण गरिएको छ ।

स्वास्थ्य कार्यालय ललितपुरले दिएको जिम्मेवारी अनुसार ३६ स्वास्थ्य संस्थाका स्वास्थ्यकर्मीसहित अग्रपंतिमा खटिएका करिब ३ हजारको संख्यामा सुरक्षाकर्मी तथा सरसफाइका कर्मचारीलाई खोप लगाइने अस्पतालले जनाएको छ ।

खोप लगाउने कार्यको प्राविधिक तथा प्रशासनिक सम्पूर्ण काम किष्ट अस्पतालले नै गर्ने अस्पतालले जनाएको छ ।

खोप वितरणको काम पनि अस्पतालका मेडिसिन विभागका विभागीय प्रमुख एवं श्वासप्रश्वास रोग बिशेषज्ञ प्रा.डा. मिलेसजङ सिजापतिलाई खोप प्रदान गरी शुभारम्भ गरिएको छ ।

राष्ट्रिय अभियानको यस महत्वपूर्ण जिम्मेवारीलाई सगर्व निर्वाह गर्न शिक्षण अस्पताल प्रतिबद्ध रहेको सिजापतिले बताए ।

सेवाग्राहीका सुविधाका लागि वेटिङ कक्ष, रजिष्ट्रेशन डेक्सका साथै ६ वटा खोप डेक्सहरु र त्यहाँ खटिने प्राविधिक एवं स्वयंसेवक कर्मचारीहरुलाई आवश्यक तालिम दिई खटाईएकोछ ।

खोप लिने व्यक्ति (सेवाग्राही) लाई खोप कार्डमा उपलव्ध विवरणहरु जानकारी गराई दस्तखत वा ल्याप्चे लगाई मञ्जुरी लिई मात्र खोप प्रदान गरिएको छ । दोस्रो मात्रा (डोज) खोप लिनका लागि खोप केन्द्रबाट उपलब्ध गराईएको कार्ड सुरक्षित राख्नुपर्नेकिष्ट शिक्षण अस्पतालका प्रमुख परिचालक अमिश पाठकले बताए ।