काठमाडौँ– अफगानिस्तानबाट उद्धार गरेर नेपाल फर्काउन तयारी अवस्थामा राखिएका नेपालीहरु सुरक्षित रहेको परराष्ट्र मन्त्रालयले जनाएको छ । काबुल विमानस्थल नजिकैको सुरिक्षत स्थानमा ४२ जना नेपालीलाई राखिएको छ । ती सबै नेपालीहरु सकुशल रहेको परराष्ट्र मन्त्रालयकी प्रवक्ता सेवा लम्लासलले जानकारी दिइन् ।

विहीबार काबुल विमानस्थल नजिकै दुई वटा बम विस्फोट हुँदा १३ जना अमेरिकी सैनिकसहित कम्तिमा ९० जनाको मृत्यु भएको थियो । सो आत्मघाति आक्रमणमा कम्तिमा १५० जना घाइते भएका छन् । विहीबारको आक्रमणपछि उद्धार कार्यमा कठिनाइ भइरहेको छ । ती ४२ जना नेपालीहरु काबुलबाट बाहिर जान विमान कुरेर बसिरहेका छन् ।

तर, उनीहरुको उडानबारे कुनै टुंगो भने लागेको छैन । परराष्ट्रकी प्रवक्ता लम्सालले उनीहरुको उद्धारका लागि सबै पक्षसँग समन्वय भइरहेको बताइन् । तर उनीहरु कहिले काबुलबाट बाहिर निकालिन्छन् भन्ने विषयमा भने यकिन नभएको बताइ्न् । उनले नेपालीहरुको सुरक्षा र उद्धार अहिलेको सबैभन्दा मुख्य चासोको विषय भएको बताइन् ।