काठमाडौँ– जनता समाजवादी पार्टी (जसपा) का शीर्ष नेताको बैठक विना निष्कर्ष टुंगिएको छ । सरकारविरुद्ध कांग्रेस र माओवादी मिलेर ल्याउन लागेको अविश्वासको प्रस्तावमा समर्थन गर्ने वा नगर्ने भन्ने विषयमा निर्णय बैठक बसे पनि आजको बैठकले कुनै निर्णय गरेन ।

बैठकमा सहभागी एक नेताका अनुसार पार्टी केन्द्रीय कार्यालय बालकुमारीमा भएको छलफलबाट कुनै निष्कर्ष निस्किएन । पार्टीका शीर्ष नेताहरु महन्थ ठाकुर, बाबुराम भट्टराई, उपेन्द्र यादव, राजेन्द्र महतो, अशोक राई र राजेन्द्र श्रेष्ठ बैठकमा सहभागी थिए ।

हाल जसपाका ठाकुर र महतो प्रधानमन्त्री केपी शर्मा ओली नेतृत्वको सरकारलाई समर्थन गर्ने पक्षमा छन् । यस क्रममा उनीहरुले विभिन्न चरणमा सरकारसँग वार्ता गरिसकेका छन् ।

तर, जसपाका अर्का दुई नेता यादव र भट्टराई भने सरकारमा जानुहुन्न र ओलीविरूद्ध अविश्वास प्रस्ताव अगाडि बढाउनुपर्छ भन्ने पक्षमा छन् । जसपाको अनिर्णयका कारण सरकारविरुद्ध तत्काल अविश्वासको प्रस्ताव नआउने भएको छ ।