लण्डन– विद्यालयका लागि शुक्रबारबाट इंग्ल्याण्डमा सुरु गरिएको नयाँ संगीतको पाठ्यक्रममा भारतीय शास्त्रीय संगीत, बलिउडका हिट र भाँगडा बिट समेटिएको छ । यहाँको शिक्षा विभागले इंग्ल्याण्डका सबै विद्यालयमा यो योजना लागु गरिएको उल्लेख गरेको छ ।

अमर उजालामा प्रकाशित समाचारअनुसार धेरै भन्दा धेरै युवाहरुलाई संस्कृतिको माध्यमबाट संगीतको बारेमा जानकारी दिने अवसरका रुपमा यसलाई प्रस्तुत गरिएको छ ।

पाठ्यक्रममा किशोरी अमोनकरको ‘सहेली रे’, अनुष्का शंकरको ‘इण्डियन समर’, ए आर रहमानको ‘जय हो’ र बलिउड बक्सअफिस हिट गीत ‘मुन्नी बदनाम हुई’ समेटिएको छ ।

निर्देशिकामा आधुनिक ब्रिटिश पहिचान समृद्ध र विविधतापूर्ण रहेको स्वीकार्न उल्लेख छ । फिल्म ‘दबंग’मा समेटिएको गीत ‘मुन्नी बदनाम हुई’लाई गीतमा संगीत, नृत्य र रंगीन दृश्यमा बलिउड फिल्मको कैयौं विशेषता समेटिएको पाठ्यक्रममा उल्लेख छ ।

शिक्षा विभागले पाठ्यक्रम १५ संगीत शिक्षा विशेषज्ञ, शिक्षक र संगीतकारको समितिले तयार पारेको उल्लेख गरेको छ ।