मुम्बई(एजेन्सी)– बलिउड अभिनेत्री कंगना रनावत भारतमा किसानले गरिरहेको आन्दोलनका विषयमा लगातार ट्वीट गरिरहेकी छन् । मंगलबार देशभरका किसानले ट्रयाक्टर र्‍याली निकालेपछि विभिन्न स्थानमा हिंसा भयो । यही विषयमा उनले एक ट्वीट गरिन् र आफ्नो सम्पूर्ण रिस त्यसमै पोखिन् । उनको यही आक्रोशका कारण उनले करोडौंको प्रोजेक्ट गुमाएकी छन् ।

कंगनाका अनुसार किसानको विरोध गर्दा ६ वटा ठूला ब्राण्डले उनीसँग गरेको र गर्न लागेका सम्झौता रद्द गरेका छन् । ‘६ वटा ब्राण्डले मसँग आफ्नो सम्झौता रद्द गरेका छन् । त्यसमा केहीमा सम्झौता भइसकेको थियो भने केही हुनेवाला थिए । मैले किसानलाई आतंकवादी भनेर बोलाएको उनीहरुको भनाई छ । त्यहीकारण उनीहरुले मलाई एम्बासडर बनाउन चाहेनन्’, उनले ट्वीटेकी छन् ।

उनले यस्ता हिंसाको समर्थन गर्ने जोकोही भारतीय व्यक्ति आतंकवादी रहेको दाबी गरेकी छन् । ‘त्यसमा ती व्यक्ति पनि सहभागी छन्, जो एन्टी नेशनल ब्राण्ड हुन्’, उनले लेखेकी छन् ।

कंगनाले ट्वीटमा अभिनेत्री प्रियंका चोपडा र अभिनेता दिलजीत दोसाँझमाथि पनि निशाना लगाएकी छन् । यी दुवै स्टारले किसानको प्रदर्शनलाई समर्थन गरेका थिए । कंगनाले दुवैलाई ट्याग गर्दै ‘प्रियंका र दिलजीत तपाईंहरुले यसलाई सम्झाउनुपर्नेछ । सारा विश्व हामीमाथि हाँसिरहेको छ । तपाईंहरुले यही चाहनुभएको थियो हैन । बधाई छ’ भनेर लेखेकी छन् ।