काबुल– अफगानिस्तानमा दोस्रो पटक सत्तामा आएको इस्लामिक कट्टरपन्थी तालिबानले पाकिस्तानलाई आफ्नो दोस्रो घर भएको बताएको छ । तालिबान प्रवक्ता जबीबुल्लाह मुजाहिदले पाकिस्तान दोस्रो घर भएको भन्दै आफूहरुले पाकिस्तानविरुद्ध केही हुन नदिने बताएका छन् ।

बीबीसीका अनुसार अफगानिस्तानको भूमिलाई कुनै अर्को मुलुकविरुद्ध प्रयोग हुन नदिनेसमेत बताएका छन् । उनले अफगानिस्तानमा इस्लामिक आतंकि संगठन आईएसआईएसको कुनै संगठन नरहेकोसमेत बताएका छन् । उनले अफगानिस्तानमा कुनै आतंकी संगठनलाई स्थान नभएको बताएका छन् ।

तालिबानले भारत र पाकिस्तानको सम्बन्धबारे पनि बोलेको छ । तालिबान प्रवक्ता मुजाहिदले भारत र पाकिस्तानले आपसी विवाद वार्ताकै माध्यबाट सुल्झाउनुपर्ने बताएका छन् । उनले दुबै देश छिमेकी भएको भन्दै छिमेकीबीचको समस्या समाधान हुनुपर्ने बताएको बीबीसीले उल्लेख गरेको छ ।

तालिबानले जम्मू कश्मीरबारे बोल्दै भारतले विवादित क्षेत्रका विषयमा संवेदनशील सकरात्मक हुनुपर्ने बताएका छन् । उनले तालिबानले भारतसँग पनि सुमधुर सम्बन्ध चाहेको बताएका छन् । तर अफगानिस्तानमा तालिबानको कब्जा भएपछि भारतले आफ्नो दूतावास बन्दसमेत गरेको छ ।

यसैबीच इस्लामिक संगठन अल कायदाले अफगानिस्तानमा तालिबानले कब्जा गरेकोमा बधाइ दिएको छ । बीबीसीका अनुसार अल कायदाको एसियाली संगठनले एक वक्तव्य जारी गर्दै बधाई दिएको हो ।