काठमाडौँ– नेकपा एमालेको केन्द्रीय कमिटी बैठक तुलसिलाल स्मृति प्रतिष्ठानको भवन च्यासलमा सुरु भएको छ । एमाले विभाजनपछि पहिलो पटक केन्द्रीय कमिटी बैठक बसेको हो । पार्टी अध्यक्ष केपी शर्मा ओलीको अध्यक्षतामा बैठक बसिरहेको छ ।

यो बैठकले एमाले विभाजन गरेर नेकपा (एकीकृत समाजवादी) पार्टी गठन गर्ने नेताहरुलाई कारबाही गर्ने एजेण्डा रहेकाे छ । विहीबारको बैठकमा पार्टी विभाजनअघि माधव समूहमा रहेका केन्द्रीय सदस्यहरु पहिलो पटक एमाले बैठकमा सहभागी भएका छन् ।

केन्द्रीय सदस्यहरु भानुभक्त जोशी, निरज आचार्य, राजबहादुर बुढा, श्रीमाया थकाली, रचना खड्का, अरुण नेपाल, यज्ञराज सुनुवारलगायत नेताहरु पुस ५ यता पहिलो पटक ओलीको अध्यक्षतामा बसेको बैठकमा सहभागी भएका हुन् ।

उता उपाध्यक्ष वामदेव गौतम भने विहीबारको बैठक अनुपस्थित भएका छन् । उनी एकीकृत समाजवादीमा पनि छैनन्, एमाले बैठकमा पनि गएनन् ।