काठमाडौँ– माधवकुमार नेपाल नेतृत्वको नेकपा (एकीकृत समाजवादी) पार्टीले विहीबार पत्रकार सम्मेलन गर्दै आफ्ना धारणा सार्वजनिक गर्ने भएको छ । निर्वाचन आयोगबाट सो दलले बुधबार अबेरमात्र दल दर्ताको प्रमाण पत्र पाएको थियो ।

सो पार्टी नेता माधवकुमार नेपालले सामाजिक सञ्जालमार्फत पत्रकार सम्मेलन दिउँसो २ बजे क्वालिटी ब्यांक्वेटमा गर्न लागिएको जानकारी दिएका छन् । एमाले विभाजन गरेर बनेको यो दलले आफ्नो नीति तथा कार्यक्रम, सिद्धान्त, संरचनालगायतका विषयमा जानकारी दिन लागेको हो ।

एमाले विभाजन भएसँगै त्यसका प्रभावहरु पनि देखिन थालेका छन् । एमाले विभाजन भएपछि सबैभन्दा पहिलो झड्का प्रदेश नम्बर १ का मुख्यमन्त्री शेरधन राईलाई परेको छ । उनले विहीबार पदबाट राजीनामा दिएका छन् । एमालेकै नेता भीम आचार्य मुख्यमन्त्री नियुक्त भएका छन् । बागमतीकी नवनियुक्त मुख्यमन्त्री अष्टलक्ष्मी शाक्य अल्मतमा परेकी छन् ।

प्रदेश नम्बर १ मा पनि भीम आचार्यले कसरी बहुमत पुर्याउँछन् त्यो भने निश्चित छैन । तर विहीबार उनी सिंगो एमालेको संसदीय दलको नेताको हैसियतमा मुख्यमन्त्री नियुक्त भएका छन् ।