काठमाडौँ– नेपाल पत्रकार महासंघका केन्द्रीय अध्यक्ष विपुल पोखरेल सवार कार दुर्घटनामा परेको छ ।

अध्यक्ष पोखरेलसहित दाङ जिल्ला अध्यक्ष दुर्गालाल केसी, उपाध्यक्ष सन्तोष सुवेदी र सल्लाहकार सुदीप गौतम सवार कार दुर्घटनामा परेको हो ।

गौतमको टाउकोमा चोट लागेको र अरुलाई खासै केही नभएको इलाका प्रहरी कार्यालय तुलसीपुरका प्रमुख शिवबहादुर सिंहले जानकारी दिए ।

अहिले गौतमको राप्ती प्रादेशिक अस्पताल तुलसीपुरमा उपचार भइरहेको छ ।

रा १ च ९५५ नम्बरको स्कारपिओले पोखरेल सवार गाडीलाई ठक्कर दिएको हो । ठक्कर दिने गाडीलाई इलाका प्रहरी कार्यालय तुलसीपुरले नियन्त्रणमा लगिसकेको छ । कार पूर्ण रुपमा क्षतिग्रस्त भएको छ ।

पत्रकार शिव लम्सालले कार दुर्घटनाको तस्वीर राख्दै फेसबुकमा लेखेका छन्, ‘धन्य भगवान ठूलो दुर्घटनाबाट बचायौँ । मेरो मित्र नेपाल पत्रकार महासंघ केन्द्रिय समितिका अध्यक्ष विपुल पोखरेल सहित दाङ शाखा अध्यक्ष दुर्गा केसी,उपाध्यक्ष सन्ताेष सुवेदी र सल्लाहकार सुदीप गाैतमको शीघ्र स्वास्थ लाभको कामना गर्दछु ।’