काठमाडौँ-  प्रदेश १ का मुख्यमन्त्री शेरधन राईले मन्त्रिपरिषद् विस्तारको तयारी गरेका छन् ।

निकट स्रोतका अनुसार पुनर्गठनमा माओवादीबाट एमाले प्रवेश गरेका प्रदेशसभा सदस्य टंक आङबुहाङ अर्थमन्त्री हुँदैछन् ।

यस्तै साविक नेकपामा प्रचण्ड-माधव समूहबाट ओली समूहमा फर्किएकी एमाले सांसद उषाकला राईलाई सामाजिक विकास मन्त्री बनाइँदैछ ।

यस्तै अहिले राज्यमन्त्री रहेका अम्बीरबाबु गुरुङ भौतिक पूर्वाधारमन्त्री र राम राना कृषिमन्त्री हुने भएका छन् ।

उदयपुरकी कला घले र मोरङका राजकुमार ओझा राज्यमन्त्री नियुक्त गर्ने तयारी भएको छ । नयाँ मन्त्रीहरूले आजै साढे १ बजे शपथग्रहणको तयारी गरिएको जनाइएको छ ।

एमाले नब्यूँतिदासम्म आफ्नै पार्टीका सांसदले अविश्वासको प्रस्ताव ल्याएर अप्ठ्यारोमा परेका राई अहिले फेरि बहुमतमा छन् ।

पुस २३ सर्वोच्च अदालतले नेकपा एमाले र माओवादी केन्द्र ब्यूँताइदिएपछि प्रधानमन्त्री एवं एमाले अध्यक्ष केपी शर्मा ओली समूह बलियो भएको छ ।

अदालतले उक्त फैसलासँगै केन्द्रदेखि प्रदेशसम्मको शक्ति समीकरण फेरबदलतर्फ अघि बढेको छ ।