काठमाडौँ– काठमाडौंस्थित भारतीय राजदूतावासले भारतको ७२ औं गणतन्त्र दिवस विवध कार्यक्रमको आयोजना गरी मनाएको छ ।

दिवसका अवसरमा नेपालका लागि भारतीय राजदूत विनय मोहन क्वात्राले झण्डोत्तोलन गरी भारतको राष्ट्रिय झण्डा फहराएका थिए । त्यसपश्चात भारतका राष्ट्रपतिको सन्देश पढेर सुनाएका थिए ।

उक्त दिवसको अवसरमा राजदूतद्वारा वीर नारी, मृतक सैनिकका श्रीमती र मृतक सैनिकका निकटतम नातेदारलाई नेरु ३.६८ करोड नगद तथा कम्मल वितरण गरी सम्मान गरिएका थियो ।

दूतावासले नेपालका ५० पुस्तकालय तथा शैक्षिक संस्थाहरुलाई पुस्तक उपहारस्वरुप प्रदान गरेको छ ।

आजै दूतावासले इंडिया हाउसमा स्वागत समारोहको आयोजना गरेको थियो ।  समारोहमा परराष्ट्रमन्त्री प्रदीप कुमार ज्ञवाली प्रमुख अतिथिको रुपमा सहभागी भएका थिए ।

स्वागत समारोहमा नेपालका पूर्व राष्ट्रपति रामवरण यादवले ‘India-Nepal Alumni Network Sampark’ का साथै www.samparkbharatnepal.com वेबसाइटको शुभारम्भ गरेका थिए ।

समारोहमा भारतमा अध्ययन गरेका नेपालका शीर्ष नेता, अधिकारी, पत्रकार लगायतको सहभागिता रहेको थियो ।

भारत र नेपालबीचको जनस्तरको सम्बन्धलाई थप सुदृढ बनाउन उनीहरुले योगदानलाई कदर गर्दै सम्मान समेत गरिएको थियो ।

भारतीय राजदूतावासद्वारा आयोजित ‘ Maitri Through My Lens’ फोटो प्रतियोगिताका तीन उत्कृष्ट प्रतियोगीलाई चेक तथा प्रमाणपत्र प्रदान गरिएको थियो ।
हेरौँ केही तस्वीरहरु