दोहा- जनउद्धार केन्द्र मलेसियाले प्यारालाइसिसले थला परेका एक नेपालीलाई उद्धार गरी स्वदेश पठाएको छ ।

अवैधानिक रुपमा मलेसियाको मेलाका राज्यमा काम गर्दै आएका नवलपरासीको साविक हरपुर- ५ का ४० वर्षीय हरिशचन्द्र केवटलाई उद्धार गरी स्वदेश पठाइएको जनउद्धार केन्द्रका अध्यक्ष केशु थापाले जानकारी दिए ।

हरिशचन्द्रको अवस्था थाहा पाएपछि उनको परिवार र साथीहरूले जनउद्धार केन्द्र समक्ष सहयोगको याचना गरेपछि शुक्रबार हिमालयन एअरलाइन्सको उडान मार्फत स्वदेश पठाइएको अध्यक्ष थापाले बताए ।

थापाका अनुसार प्रतिकुल परिस्थितिको फाइदा उठाउँदै उनी कार्यरत कम्पनीले उपचारमा मोटो रकम खर्च भएकोले नेपाल पठाउन नसक्ने जवाफ दिएको थियो । कम्पनीले नै उपचारमा समेत पन्छिन खोजेपछि आफूहरुले सहयोग गरेको उनले बताए ।

शारीरिक रुपमा पनि अशक्त भएकोले उनीसँग साथमा नेपालसम्म पुग्नेगरी एक सहयोगी पनि साथमा पठाइएको थापाले बताए । बिरामीको अवस्थाबारे परिवारले जनउद्धार केन्द्रलाई निवेदन दिएपछि उनको उद्धारमा केन्द्र लागि परेको थियो ।