काठमाडौँ– नेपाली कांग्रेसका नेताहरुले निष्पक्षताका साथ क्रियाशील सदस्यताको टुङ्गो लगाउनुपर्ने बताएका छन् ।

नेपाली कांग्रेसको आसन्न महाधिवेशनको रणनीति बनाउन वरिष्ठ नेता रामचन्द्र पौडेलले बोलाएको बैठकमा नेताहरुले निष्पक्षताका साथ क्रियाशील सदस्यताको टुङ्गो लगाउनुपर्ने र क्रियाशील सदस्यता छानविन समितिले गम्भीरतापूर्वक ध्यान दिनुपर्ने निष्कर्ष निकालेको हो ।

वडा समितिको अधिवेशन अघि नै क्रियाशील सदस्यताको टुङ्गो लगाउनुपर्ने निष्कर्ष निकालिएको छलफलमा सहभागी कांग्रेस नेता प्रकाशमान सिंहले जानकारी दिए ।

त्यस्तै सभापतिको उम्मेदवारका विषयमा पनि छलफल भएको उनले बताए । त्यस्तै नेता अर्जुन नरसिंह केसीले क्रियाशील सदस्यता वितरणमा त्रुटी देखिएकोले पारदर्शी ढंगले यस विषयको अन्तिम टुङ्गो लाग्नुपर्ने बताए ।

महाधिवेशनको तयारी, नीति र नेतृत्वबारे छलफल भएको नेताहरुले जनाएका छन् । महाधिवेशनको माहोल बढ्दै जाँदा शीर्ष नेताहरू आन्तरिक छलफलमा केन्द्रित भइरहेको बेला पौडेलले पनि आफूपक्षीय केन्द्रीय सदस्यहरूसँग छलफल गरेका हुन् । वरिष्ठ नेता पौडेलसहित सो समूहको छलफलमा महामन्त्री डा.शशांक कोइराला, पूर्वमहामन्त्री प्रकाशमान सिंह र नेता डा. शेखर कोइराला लगायतका नेताहरुको सहभागी भएका थिए ।