जनकपुरधाम– धनुषामा छोराले बाबुको हत्या गरेको छ । अंश विवादमा छोराले बिहीबार राति बाबुको हत्या गरेका छन् ।

धनुषाधाम नगरपालिका– १ काशिपुर बस्ने ७० वर्षीय विशो यादवलाई आफ्नै कान्छो छोरा श्रीकृष्ण यादवले हत्या गरेको धनुषाका प्रहरी नायव उपरीक्षक मकेन्द्र मिश्रले जानकारी दिए ।

विवाद भएपछि आक्रोसमा आएर छोरा श्रीकृष्णले मसला कुट्ने खलले प्रहार गरी बाबुको हत्या गरेको प्रहरीको दाबी छ ।

अंशबण्डा र अन्य घरायसी विवादका कारण घरमा निरन्तर झै घगडा तथा कुटपिट भइरहेको स्थानीयको भनाइ छ । घटनामा संलग्न रहेको आरोपमा प्रहरीले विशोका कान्छो छोरालाई पक्राउ गरेको छ ।

सोधपुछको क्रममा अपराध स्वीकार गरेपछि उनलाई घरबाटै पक्राउ गरिएको डिएसपी मिश्रले बताए ।

मृतक यादवको शव पोष्टमार्टमको लागि प्रादेशिक अस्पताल जनकपुरमा ल्याइएको छ । मृतक यादवका तीन छोरा छन् । घटनाबारे थप अनुसन्धान भइरहेको प्रहरीले जनाएको छ ।