मुम्बई – सन् २०२० बलिउडका लागि निकै खराब साबित भइसकेको छ । गत वर्ष फिल्म उद्योगका कैयौं चर्चित अनुहारहरुको निधन भयो ।

नयाँ वर्ष शुभारम्भ भएको २५ दिन बित्न नपाउँदै कन्नड फिल्म उद्योगबाट एउटा दुःखद आएको छ ।

कन्नड अभिनेत्री एवं ‘बिग बोस कन्नड’ प्रतियोगी जयश्री रमैयाको शंकास्पद निधन भएको छ । सोमबार उनको शवलाई बेंगलुरुको एक पुनर्वास केन्द्रमा भेटिएको छ । खबर अनुसार उनी लामो समयदेखि डिप्रेसनमा थिइन् ।

उनको निधनले कन्नड उद्योगमा शोकको लहर छाएको छ । उनले गत वर्ष सामाजिक सन्जालमा आफू डिप्रेसनमा रहेको र संसार छोड्न चाहेको लेखेपछि एकाएक चर्चामा आएकी थिइन् ।

‘म अलबिदा भन्दछु । गुड बाइ दुनियाँ र डिप्रेसन’ उनले लेखेकी थिइन् । उनको यो पोस्ट सामाजिक सञ्जालमा निकै भाइरल भएको थियो । यद्यपि उनले केही समयपछि अर्को पोस्ट लेख्दै आफू पूर्ण रुपमा ठिक र सुरक्षित रहेको उल्लेख गरेकी थिइन् ।