काठमाडौँ –  प्रधानमन्त्री केपी शर्माले दिएको अभिव्यक्तिको विषयमा नेपाल बार एसोसिएसनले खेद प्रकट गरेको छ ।

एसोसिएसनले प्रधानमन्त्री ओलीले अमर्यादित, अपमानजनक र असहिष्णु अभिव्यक्ति दिएको भन्दै आपत्ति र खेद प्रकट गरेको हो ।

‘राज्यको प्रमुख निकाय कार्यपालिका प्रमुख प्रधानमन्त्री श्री खड्गप्रसाद ओलीले मिति २०७७ माघ ९ गतेका दिन आफ्नो पार्टीको कार्यक्रममा सम्बोधन गर्ने क्रममा ‘वकिलले कुरा फिटेका फिट्यै छन्, केही वकिलहरुले एकजना बाजे वकिललाई लिएर गएछन् त्यहाँ तमासा हेर्न’ भनी दिनुभएको अभिव्यक्ति संविधान, कानून र सम्माननीय प्रधानमन्त्री स्वयंको पदीय मर्यादा, आचरण अनुकूल पनि छैन,’ विज्ञप्तिमा भनिएको छ ।

बारका महासचिव लिलामणि पौडेलले जारी गरेको विज्ञप्तिमा उक्त अभिव्यक्तिप्रति प्रधानमन्त्रीले तत्काल माफी माग्नसमेत माग गरिएको छ ।

उक्त अभिव्यक्ति हाम्रा वरिष्ठतम वरिष्ठ अधिवक्ता कृष्णप्रसाद भण्डारीज्यू र समग्र कानुन व्यवसायीकै विरुद्ध मात्र नभएर अदालतकै मानहानी र अवहेलना जन्य कार्य समेत हो,’ विज्ञप्तिमा भनिएको छ ।

बारले प्रधानमन्त्रीले यस्ता किसिमका अभिव्यक्ति नदोहोर्‍याउन समेत चेतावनी दिएको छ ।