काठमाडौँ– एमाले स्थायी कमिटीको बैठक तुलसीलाल स्मृति प्रतिष्ठानको भवनमा जारी छ । विभाजनको औपचारिकता पाउन लागेको एमालेको स्थायी कमिटी बैठक बसेको हो । माधवकुमार नेपालको अगुवाईमा एमालेलाई विभाजन गरेर नेकपा (एकीकृत समाजवादी) गठनको प्रक्रिया शुरु भएपछि एमालेको पहिलो पटक स्थायी कमिटी बैठक बसेको हो । यो बैठकमा विभाजनअघि माधव समूहमा रहेका १० जना स्थायी किमटी सदस्यहरु एमाले बैठकमा सहभागी भएका छन् ।

उपाध्यक्षहरु भीम रावल, अष्टलक्ष्मी शाक्य र युवराज ज्ञवाली, उपमहासचिब घनश्याम भुसाल, सचिवहरु भीम आचार्य, गोकर्ण विष्ट र योगेश भट्टराई, स्थायी कमिटी सदस्यहरु सुरेन्द्र पाण्डे, अमृतकुमार बोहोरा र रघुजी पन्त बैठकमा सहभागी भएका हुन् । यी नेताहरु गत पुस ५ मा तत्कालिन ओली सरकारले प्रतिनिधिसभा विघटन गरेपछि पहिलो पटक एमाले अध्यक्ष ओलीसँगको एमालेको बैठकमा सहभागी भएका हुन् ।

यो बैठकले यसअघि कार्यदल स्तरमा भएको १० बुँदे सहमतिका विषयमा महत्वपूर्ण निर्णय गर्ने जनाइएको छ ।