काठमाडौँ– चिकित्सा शिक्षा आयोगले पहिलो पटक लिएको स्नातक तहको एकीकृत प्रवेश परीक्षा अव्यवहारिक भएको भन्दै नर्सिङ तथा पारामेडिक्स अध्ययन गराउने कलेज सञ्चालकहरूले विरोध जनाएका छन् ।

सोमबार पत्रकार सम्मेलन गर्दै कलेज सञ्चालकहरूले एकीकृत प्रवेश परीक्षाको नतिजालाई पुनर्विचार नगरे आफूहरूले कलेजको चावी आयोगलाई बुझाउने चेतावनीसमेत दिएका छन् ।

उनीहरूले अध्यापनका लागि तोकिएको विद्यार्थी कोटाभन्दा पनि कम उत्तीर्ण हुने मापदण्ड बनाई परीक्षा सञ्चालन गरी निजी कलेजहरूलाई बन्द गराउने रणनीति आयोगले लिएको समेत आरोप लगाएका छन ।

पूर्वाञ्चल विश्वविद्यालय अन्तर्गत नर्सिङ तथा पारामेडिक्स कलेजहरूको छाता संगठन एलाइट साइन्स इन्सिट्युसन एसासिएसन (एसिया)का अध्यक्ष यमप्रसाद अधिकारीले चिकित्सा शिक्षा आयोगमा गएर सांकेतिक रुपमा कलेजहरूको साँचो बुझाउने बताए । आयोगले सीट संख्याभन्दा कम विद्यार्थी उत्तीर्ण गराउँदा कलेजहरू बन्द हुने अवस्थामा पुगेको अधिकारीले बताए ।