मुम्बई– बलिउडमा एक समय यस्तो समय पनि आयो, जुन बेला अभिनेताहरुले आफू भन्दा कैयौं सानो उमेरका अभिनेत्रीसँग फिल्मी रोमान्स गरे ।

यो सूचीमा सलमान खान, विनोद खन्ना, शाहरुख खान, नसरुद्दीन शाहसमेत कैयौं अभिनेता पर्छन् ।

८० र ९० को दशकमा कैयौं अभिनेत्रीहरुले पनि बलिउडमा पाइला चालेर आफ्नो अलग पहिचान बनाए । उनीहरुले बढी मात्रामा अधबैशे उमेरका अभिनेतासँग रोमान्स गर्ने अवसर पाए ।

एबीपी न्यूजमा प्रकाशित समाचारअनुसार अभिनेत्री विद्या वालनले फिल्म ‘द डर्टी पिक्चर’मा आफू भन्दा ३९ वर्ष जेठा नसरुद्दीन शाहसँग अनस्क्रिन रोमान्स गरेकी थिइन् ।

फिल्म ‘दयावान’मा माधुरी दीक्षित र विनोद खन्ना एकसाथ देखिए । यो फिल्ममा माधुरीले आफूभन्दा करिब २० वर्ष ठूला विनोदसँग रोमान्टिक बनेकी थिइन् ।

त्यस्तै ‘निशब्द’मा अमिताभ बच्चन र दिवंगत अभिनेत्री जिया खानले अभिनय गरेका थिए । यो फिल्ममा अभिनय गरिरहँदा अमिताभ जिया भन्दा ४४ वर्ष जेठा थिए ।

अभिनेता शाहरुख खान र अभिनेत्री आलिया भट्ट फिल्म ‘डियर जिन्दगी’मा सँगै देखिए । उमेर अन्तर हेर्ने हो भने शाहरुख आलिया भन्दा २८ वर्ष जेठा छन् ।

आफ्नो अभिनयका कारण बलिउडमा लोकप्रियता कमाएकी अभिनेत्री सोनाक्षी सिन्हाले फिल्म ‘दबंग’बाट बलिउडमा पाइला चालिन् ।

यो फिल्ममा अभिनेता सलमान खानसँगको उनको अनस्क्रिन रोमान्सलाई दर्शकले खुबै मनपराए । उमेरको हिसाब गर्ने हो भने सलमान सोनाक्षी भन्दा २२ वर्ष जेठा छन् ।