काठमाडौँ- सावित्राको ४ गोलमा सशस्त्र प्रहरीको विभागीय टिम एपीएफले विराटगर महानगरपालिकामाथि ७-० गोल अन्तरको फराकिलो जित हासिल गरेको छ ।

राष्ट्रिय महिला लिगअन्तर्गत आज (आइतबार) सम्पन्न खेलमा एपीएफको जितमा सावित्राले दोस्रो ह्याट्रिक गरेकी हुन्।

उनले यसअघिको खेलमा चन्द्रपुर नगरविरुद्ध ह्याट्रिक गरेकी थिइन्। आजको खेलसँगै उनले दुई खेलमा ७ गोल गरेकी छन्।

पहिलो हाफको २५ र ४२ औँ मिनेटमा दुई गोल गरेकी सावित्राले दोस्रो हाफको ७४ औं मिनेटमा गोल गर्दै ह्याट्रिक पूरा गरेकी थिइन्।

त्यस्तै, उनले निर्धारित समयको एक मिनेटअघि व्यक्तिगत चौथो गोल गरिन्। सावित्राबाहेक अनिता केसीले दुई गोल गरिन् भने सरु लिम्बूले एक गोल गरिन्।

आजको जितसँगै दोस्रो जित निकालेको एपीएफले लिगमा ६ अंक बनाएको छ।