पोखरा– गण्डकीको प्रदेश राजधानी पोखराको मुख्यबजार महेन्द्रपुलको जमिन भासिएको छ । आइतबारदेखि परेको अविरल बर्षाका कारण जमिन भासिएको हो ।

स्थानीय डिपार्टमेण्टल स्टोर्स अगाडि गरिमा विकास बैँकको छेवैमा रहेको सडकको फुटपाथसहितको जमिन भासिएको छ । भासिएको ठाउँमा आइतबार नै पोखरा महानगरपालिकाले माटो भरेको थियो । तर लगातार परेको पानीले पुरेको माटो पुन भासिएको छ ।

उता, म्याग्दीको बेनी नगरपालिका–३ दूधे खोलामा सोमबार बिहान बाढीले एक घर बगाएको छ । बाढीका कारण दुई दर्जन बढी घर जोखिममा परेका छन् ।

स्थानीय नारायण पुनको एउटा दुहुनो भैंसी खोलामा मृत अवस्थामा भेटिएको छ ।

भकिम्लीको लहरेनी र चिनाखेतको सीमानामा पहिरो खसेर दुधेखोलामा मिसिएकोले खोलामा आएको बाढी वस्तीतर्फ सोझिएपछि क्षति भएको हो ।

बाढीले बस्तीतर्फको झण्डै मिटर क्षेत्र कटान गरेको छ । बाढीका कारण बेनी–बरङजा सडक पनि अवरुद्ध भएको छ ।