काठमाडौँ– नेपालस्थित अमेरिकी मिशनले कोरोना रोकथाम तथा न्यूनीकरणका लागि नेपाललाई स्वास्थ्य सामग्री सहयोग गरेको छ ।अमेरिकी मिशनले स्वास्थ्य तथा जनसंख्या मन्त्रालयलाई करिव ३ लाख अमेरिकी डलर बराबरको स्वास्थ्य सामग्री सहयोग गरेको हो ।

स्वास्थ्य सामग्री सहयोगबारे नेपालस्थित अमेरिकी दूतावासले सामाजिक सञ्जाल फेसबुकमा लेखेको छ, ‘हालसालै हाम्रो डिफेन्स टिमका साथीहरूले स्वास्थ्य तथा जनसंख्या मन्त्रालयसम्म पुगेर झन्डै ३ लाख अमेरिकी डलर बराबरको श्वासप्रस्वास सम्बन्धी उपचारमा प्रयोग हुने उपकरण तथा अक्सिजन मास्कहरू हस्तान्तरण गर्नुभयो।’

कोरोना महामारीको यस विषम परिस्थितिमा नेपाल सरकारका विभिन्न निकायसँग मिलेर कोभिड प्रतिकार्यलाई कसरी चुस्त बनाउने र जीवन बचाउने उपकरणहरू कसरी थप उपलब्ध गराउने भन्ने विषयमा आफूहरु निरन्तर लागिरहेको दूतावासले जनाएको छ ।

अमेरिकाले केही दिन अघि जोन्सन एन्ड जोन्सन कम्पनीको १५ लाख ३५ हजार ८५० डोज कोभीड-१९ भ्याक्सिन उपलब्ध गराएको थियो ।