काठमाडौँ – दक्षिणकाली मन्दिरस्थित शौचालयमा भेटिएको महिलाको शव हत्य गरेर छाडेको प्रहरीको प्रारम्भिक अनुसन्धानबाट खुलेको छ ।

महानगरीय अपराध महाशाखाका प्रमुख एसएसपी चन्द्र कुवेर खापुङका अनुसार महिलाको हत्या पछि शव शौचालयमा छाडिएको प्रारम्भिक अनुसन्धानबाट खुलेको हो ।

एसएसपी खापुङ् भन्छन्, ‘घटनास्थलमा सँगैको रुखको हाँगामा महिलाको मास्क भेटिएको छ । मङ्गलबार अर्धनग्न अवस्थामा फेला परेको शवसँगै उनले लगाएको चप्पल भेटिएको छ । अहिले सम्म शवको पहिचान भएको छैन, तर हत्या पछि शव छाडिएको हाम्रो प्रारम्भिक अनुसन्धानबाट खुलेको छ ।

अनुहार चिन्न नसक्ने गरी लागेको चोटका कारण शव पहिचानमा समस्या भएको एसएसपी खापुङले बताए । मंगलबार शौचालयमा महिलाको शव भेटिएको थियो ।

अहिले शव पोष्टमार्टमका लागि त्रिवि शिक्षण अस्पतालमा राखिएको छ । यस सम्बन्धि थप अनुसन्धान भइरहेको प्रहरीले जनाएको छ ।