काठमाडौँ– मूल्यवृद्धि भएको जनगुनासो बढेपछि वाणिज्य आपूर्ति तथा उपभोक्ता संरक्षण विभागको टोलीले दिन-रात नभनी अनुगमनलाई तीव्रता दिएको छ ।

हरियो तरकारी तथा कुखुराको मासुमा अस्वभाविक मूल्य विद्धि भएको गुनासो सम्बोधन गर्न स्थानीय प्रशासनको सहयोगमा उपभोक्ता अधिकारकर्मीहरुको सहभागितामा विभागले अनुगमनलाई तीव्रता दिएको हो ।

अनुगमन टोलीले बिहीबार मध्यरातमा काठमाडौं भित्रिने प्रमुख नाका थानकोटमै पुगेर अनुगमन गरेको विभागका निर्देशक एवं प्रवक्ता शिवराज सेढाईंले बताए ।

‘स्रोत मै अनुगमन गर्ने नीति अनुरुप हामी दिन रात नभनी काममा जुटेका छौँ, विहीबार मध्यरातमै उपत्यका प्रवेश गर्ने कखुरा र तरकारी बोकेको मालवाहक सवारी साधनको अनुगमन गरिएको हो ।’

थोक व्यवसायीबाट उनीहरूले श्रृंखलाबद्ध कारोबारको विवरण समेत लिएका थिए ।

विभागले व्यवसायीलाई तीन दिनभित्र व्यवसाय दर्ता, नविकरण तथा खरिद बिक्री कागजात पेश गर्न निर्देशन समेत दिएको छ ।

टोलीले अनुगमनका क्रममा उत्पादक र उपभोक्ता मूल्यबीच ठूलो अन्तर रहेको, उत्पादकदेखि उपभोक्तासम्म अस्वभाविक धेरै व्यापारिक तह रहेको, खरिद र बिक्री बिल बिजन नभएको फेला पारेको जनाएको छ ।