मुम्बई– केही समयअघिदेखि सञ्चारमाध्यममा बलिउड अभिनेता अजय देवगन यशराज व्यानरको सुपरहिरो फिल्ममा अनुबन्धित भएको समाचार आइरहेको थियो । फिल्ममा उनी सुपरभिलेन चरित्रमा देखिने चर्चा थियो ।

बलिउडलाइफमा प्रकाशित समाचारअनुसार व्यस्त समय तालिका भएपछि अजयले यो फिल्मबाट हात झिकेका छन् । बलिउडका अहिलेका व्यस्त कलाकार अजयको हातमा फिल्मको सूची नै छ । त्यहीकारण उनले यो सुपरहिरो फिल्ममा समय दिन नसकेको उनी निकट स्रोतले बताएको छ ।

अजयको हातमा अहिले ७ देखि ८ फिल्म छन् । जसमध्ये केहीको छायांकन पुरा भइसकेको छ भने केहीको पुरा हुन बाँकी छ ।

निकै लामो समयदेखि रोकिएको यो फिल्ममा अभिनेता चंकी पाण्डेका भतिज अहान पाण्डे डेब्यू गर्दैथिए । जसको बजेट १ सय ८० करोड रुपैंयाँ थियो । अजयले समय दिएको भए यो फिल्ममा अहानको द्वन्द्व अजयसँग हुने निश्चित थियो ।