काठमाडौँ- देवदत्त पडिकलको शतक मद्दतमा रोयल च्यालेन्जर्स बैंगलोरले आईपीएल टी-ट्वान्टी क्रिकेटमा लगातार चौंथो जित निकालेको छ ।

बिहीबार राति भएको खेलमा राजस्थानलाई १० विकेटले पराजित गर्दै बैंगलोरले चौंथो जित निकालेको हो ।

राजस्थानले दिएको १ सय ७८ रनको लक्ष्य बैंगलोरले १६ ओभर ३ बलमा बिना विकेटको क्षतीमा पूरा गर्‍यो ।

बैंगलोरको जितमा पडिकलले अविजित १ सय १ रनको शतकीय इनिङ्स खेले । उनको यो आईपीएलमा पहिलो शतक हो  ।

कप्तान विराट कोहलीले अविजित ७२ रनको इनिङ्स खेले । यसअघि टस हारेर पहिले ब्याटिङ गरेको राजस्थानले २० ओभरमा ९ विकेट गुमाएर १ सय ७७ रन बनाएको थियो ।

राजस्थानका लागि शिबम डुबेले सर्वाधिक ४६ रन बनाए । राहुल टेवाटियाले ४० रन जोड्दा रियान परागले २५ रन बनाए ।

जितसँगै बैंगलोर ४ खेलमा ८ अंक जोड्दै शीर्ष स्थानमा उक्लिएको छ । ४ खेलमा २ अंक रहेको राजस्थान पुछारमा रहेको छ ।